Valmynd

Úthlutun úr Menningarsjóði VÍB

Menningarsjóður VÍB veitti styrki til þriggja verkefna í gær, mánudaginn 19. desember, við hátíðlega athöfn í nýju útibúi Íslandsbanka í Norðurturni.

Úhlutunin í gær nemur samtals tveimur milljónum króna. Verkefnin sem hlutu styrk eru:

Margrét Jónsdóttir og Kristín Guðrún Gunnlaugsdóttir: Super Black sýning í Kaupmannahöfn: 1.000.000 kr. Vegna sýningarinnar Super Black sem opnar í Nordbryggen, Kaupmannahöfn 1. september 2017. Sýningin heldur síðan áfram til Færeyja í febrúar 2018. Super Black er samstarfsverkefni þriggja listamanna, Kristínar Gunnlaugsdóttir, myndlistarkonu með olíumálverk, Margrétar Jónsdóttur leirlistakonu með innsetningar og Valgeirs Sigurðssonar tónlistarmanns.

Pamela De Sensi Kristbjargardóttir: Djassútgáfa af Pétri og Úlfinum: 600.000 kr. Útgáfa á Pétri og Úlfinum eftir Prokofiev í djassútgáfu til að kynna djasstónlist fyrir börn. Að útgáfunni standa Pamela De Sensi Kristbjargardóttir í samstarfi við Stórsveit Reykjavíkur. Stefán Karl Stefánsson leikari verður í hlutverki sögumanns.

Emilía Rós Sigfúsdóttir: Geisladiskur til kynningar erlendis: 400.000 kr. Verkefnið felur í sér vinnu við undirbúning, upptökur og útgáfu á öðrum geisladiski umsækjanda, Emilíu Rósar Sigfúsdóttur með píanóleikaranum Ástríði Öldu Sigurðardóttur.

Elín Jónsdóttir, framkvæmdastjóri VÍB:

„Við hjá Menningarsjóði VÍB erum afskaplega ánægð að geta stutt við þessi verkefni með okkar framlagi og óskum listamönnunum góðs gengis með þau.”

Til viðbótar við úthlutunina í dag þá hlutu fjögur verkefni styrki í vor að upphæð samtals 1.950.000 krónur.

Markmið Menningarsjóðs VÍB er að efla menningu og listir. Sjóðurinn styrkir fagfólk, eða hópa fagfólks, í listum og menningu en auk þess getur sjóðurinn veitt einn styrk á ári til afburðanemanda í listgrein. Stjórn sjóðsins úthlutar styrkjum að jafnaði tvisvar á ári til verkefna og auglýst er eftir umsóknum samkvæmt úthlutunarreglum sjóðsins.