Valmynd

Áhrif HM á verðbréfamarkaði

HM í knattspyrnu fer af stað með krafti, heimili landsins halda grillpartý og barir bæjarins blómstra. Áhrif mótsins eru ansi víðtæk og þar eru alþjóðlegir verðbréfamarkaðir engin undantekning. Nokkrar rannsóknir hafa verið framkvæmdar á áhrifum heimsmeistaramótsins sem leiða ýmislegt áhugavert í ljós.

nullSigurliðið

Samkvæmt rannsókn Goldman Sachs hækkar hlutabréfamarkaður heimsmeistaranna að meðaltali 3,5% umfram heimsmarkaði fyrsta mánuðinn í kjölfar sigurs. Einungis einu sinni hefur það gerst síðan 1974 að heimsmeistararnir hafi ekki gert betur en aðrir fyrsta mánuðinn.
Gleðin er hinsvegar skammvinn og þegar litið er til ávöxtunar í eitt ár frá sigri hefur hlutabréfamarkaðurinn ávaxtast um að meðaltali 4% minna en heimsmarkaðurinn.

Silfurliðið

Önnur staða er uppi þegar við skoðum silfurlið mótsins. Argentína er þar að vísu frávik en markaðurinn þar hækkaði 33% fyrsta mánuðinn eftir HM 1990. Ef við lítum fram hjá Argentínu og skoðum 10 síðustu mót hefur heimamarkaður silfurliðssins skilað verri ávöxtun en heimsmarkaðurinn mánuð eftir mót í 7 af 9 tilfellum og að meðaltali um 1,4%. Þegar þrír mánuðir frá móti eru skoðaðir hefur ávöxtunin dregist aftur úr um heil 5,6%.

Gestgjafarnir

Áhrifin virðast vera minni hjá gestgjöfunum sjálfum. Fyrsta mánuð eftir mót hefur hlutabréfaverð þar í landi gert að meðaltali 2,7% betur en heimsmarkaðir. Sú frammistaða versnar þó skjótt og þegar litið er til þriggja mánaða er árangurinn jafnvel verri.
Ljóst er að það hefur mismikil áhrif á greinar viðskiptalífsins að halda heimsmeistaramót. Ein grein sem markaðirnar hafa veðjað á að muni hagnast á mótinu í Brasilíu er flugbransinn en Gol sem er nærstærsta flugfélag Brasilíu hefur hækkað um rúm 19% frá áramótum og 36% síðustu 12 mánuði. Sömuleiðis hefur Cielo sem er brasilískt kreditkortafyrirtæki hækkað gríðarlega síðustu mánuði enda þar saman komnar tvær greinar sem gætu notið góðs af mótinu, til skemmri tíma í það minnsta.

Annað áhugavert dæmi er ein stærsta bruggverksmiðja Brasilíu, Ambrev, en bréf þeirra lækkuðu meira en þau höfðu gert í 5 ár eða 5% þegar brasilísk yfirvöld ákváðu í vor að hækka skattlagningu umtalsvert á bjór í kringum mótið.
Sjá nánar á meðfylgjandi mynd sem tekur meðal annars dæmi um þróun nokkura skráðra félaga í Brasilíu.

Virkni og velta á markaði

 nullVerðbréfamiðlarar og fjárfestar virðast hægja á fjárfestingum sínum saman þegar leikirnir sjálfir eiga sér stað. Evrópski Seðlabankinn framkvæmdi rannsókn á HM í Suður-Afríku þar sem fram kom að þegar landslið á viðkomandi markaði var að spila drógst tíðni saman um 45% að meðaltali og velta var 55% minni. Þá höfðu stórir viðburðir í leikjunum einnig áhrif en þegar mark var skorað dró um 5% til viðbótar úr virkni markaða. Þá vekur það einnig athygli að á meðan landslið á leik á HM minnka tengsl ávöxtunar viðkomandi hlutabréfamarkaðar við heimsmarkaði töluvert. Tengslin og fylgni ávöxtunar dragast saman að meðaltali um rúmlega 20%. Það sem gerir þetta sérstaklega áhugavert er að um hádegi, þegar tíðni viðskipti dregst einnig mikið saman, eru engin slík tengsl sjáanleg við heimsmarkaðinn.

Hollenski seðlabankinn framkvæmdi sömuleiðis áhugaverða rannsókn á sama móti þar sem þeir sýndu fram á að gengi liðann hefur mikil áhrif á fjárfesta á viðkomandi markaði. Líkur á brotfalli af mótinu hefur aukið líkurnar á að fjárfestar undirverðleggi bréf.
Sömuleiðis sýndi rannsókn sem birt var í The Journal of Finance árið 2007 að áhrif þess að detta úr leik á HM lækki hlutabréfamarkað í viðkomandi landi um að jafnaði 0,5% næsta dag. Áhrifin má sömuleiðis sjá í öðrum stórum íþróttargreinum og virðist hafa meiri áhrif á minni fyrirtæki en þau stærri. Við vitum ekki til þess að sambærilegar rannsóknir hafi verið framkvæmdar á Íslandi en áhugavert væri að skoða þróun innlendra markaða við gengi landsliða okkar og þá kannski ekki síst í handbolta.

Nánari upplýsingar um fjármálin á HM má sjá á HM síðu VÍB: http://www.vib.is/fotbolti

 

Heimildir:
http://www.ecb.europa.eu/pub/pdf/scpwps/ecbwp1424.pdf

http://www.dnb.nl/en/binaries/Working%20Paper%20412_tcm47-302771.pdf

http://faculty.london.edu/aedmans/SteelJF.pdf

http://www.goldmansachs.com/our-thinking/outlook/world-cup-sections/world-cup-book-2014-equity-markets.html

www.bloomberg.com

Höfundur: Gísli Halldórsson